Эсэгэ ороноо хамгаалгын дайнда туйлагдаһан Агууехэ Илалтын һайндэр

Манай Буряад ороной бүхы һуурин тосхонуудта хотонуудта энэ һайндэр тэмдэглэгдэжэ байна. Улаан-үдэ хотын Соведүүдэй талмай дээрэ сэрэгэй жагсаал һүр жабхалантайгаар үнгэрбэ. Буряад уласай Арадай Хуралай түрүүлэгшэ Владимир Павлов дайнай ветерануудые, ара талын ажалай ветерануудые, бүхы арад зонооо Агууехэ һайндэрөөр амаршалһан байна. Буряад ороной 120 мянга гаран хүн Эсэгэ ороноо хамгаалхаяа мордоһон юм. Тэдэнэрэй хахадһаа олонхинь фронтдо баатарай үхэлөөр унаа. Дайсанаа даража дайнһаа бусажа ерэһэн ветеранууд Эсэгэ ороноо һэргээн бодхоожо, экономикоео хүгжөөгөө. Мүнөө энэ дайнда хабаадаһан 253 ветеран ажаһууна. Тэдэнэр эдэ үдэрнүүдтэ амаршалгануудта хүртэнэ. Тиихэдэ Соведүүдэй талмай дээгүүр «Мүнхын жагсаал» һүрөөтэйгөөр үнгэрөө. 2013 ондо манай Буряадта «Мүнхын жагсаал» түрүүшынхиеэ үнгэргэгдэһэн байна. Эндэ үбгэ эсэгэнэрэйнгээ зурагуудые бариһан үри һадаһадынь омогорхолтойгоор ябаа.

Автор: Сергей Александров