Буряад орон соогоо суурхан дэлгэрһэн «Информ полис” сонинойхид энэ хэсүүхэн сагта гараа хабсараад миин һуужа байгаагүй, олзын хэрэг эрхилэгшэдые дэмжэхэ зорилготой “Мүнгэн годли” гэжэ нэрэтэй тэмсээниие 2016 оной апрельһээ ноябриин тэн болотор зарлаһан байгаа. Энэ хугасаа соо тэмсээндэ хабаадаха һаналтай олзын хэрэг эрхилэгшэд өөрыгөө мэдүүлхэ ёһотой байгаа. Эрхимэй эрхимүүд элирһээр элиржэ, 70 гаран олзо эрхилэгшэдэй хэжэ байһан олзын ажал тухай толилолгонууд Интернедтэтабигдажа, “Информ полис сониной хуудаһан дээрэ аржыса уншагдажа, олоной анхарал татаа юм.
Тэмсээн юундэ “Мүнгэн годли” гэжэ нэрэтэйб? Буряадуудай эгээн ехээр дээдэлдэг юһэн эрдэниин зүйл – сагаан мүнгэн арюун сэбэр гэһэн удхатай, харин годлиин шэнхинээн – сэб сэхэ зорилго, урагшаа тэгүүлэл, шуран шударгы гэһэн удха оруулна. “Эрхим олзын хэрэг эрхилэгшэ ” тэмсээн найман түсэлтэй байгаа: “Залуу олзоборилогшо”, “Амжалтын эхин”, “Ниигэмдэ туһатай наймаа эрхилэлгэ”, “Бизнес-хатан”, “Хүдөөгэй олзо эрхилэгшэ”, “Шухаг хомор” -“Эксклюзив”,
“Гадаадада” – “Экспорт”. Эдэ түсэлнүүдтэ илагшадые тусхай комисси шэлэн абаа юм. Харин “Арадай шэлэмэл” гэһэн түсэл январиин 26-ай үдэшын 20 саг болотор Интернедээр шэлэгдэхэ ёһотой байгаа.
“Үргэхэдэ үндэр сагаагшан, дарахада даахигар харагшан”, “Хүнэй сагаан хэлэн хүниие үргэхэ, хара хэлэн хүниие доошонь дараха” гэхэ мэтэ буряад арадай оньһон үгэнүүд байдаг. Буряад зон ямаршье сагта, хүшэр хүндэ саг гү, али билтарма баярай саг болоно гү, аажам тэнигэрээр байхые оролдодог, бүхы юумые һайн тээшэнь үргэмжэлөөд, һайн тээшэнь магтан хэлэдэг зантай буряад улад зон байхабди.
Тиимэһээ “Мүнгэн годли” тэмсээн арад зоной дэмжэлгэдэ хүртэжэ, тон ехэ анхарал татаа. Буряад театр соо зон олоороо сугларжа, заал соо нэгэшье сүлөө һуури угы байгаа. Илагшадта шагнал барюулга, дуу хатар зорюулга, “Мүнгэн годли” тэмсээнэй шагналнууд гэхэ мэтэ бүхыдөө гоёор, онсо ондоохоноор бэлдэжэ бүтээгдээ гэжэ хэлэмээр. Долоон түсэлдэ илагша бүхэндэ зуу-зуу мянган түхэригэй шагнал барюулагдаа. Рустам Мухамедзянов “Арадай шэлэмэл” тулалдаанда илалта туйлажа, 300 мянган түхэригтэ хүртэбэ.
“Мүнгэн годли” гэһэн олзын хэрэг эрхилэгшэдэй тэмсээн хойшодоо заншалта болохо юм.
Информ Полис
1421
"Мүнгэн годли" олзо эрхилэгшэдэй тэмсээн
"Информ полис" сониной "Мүнгэн годли" тэмсээнэй долоон түсэлдэ илагша бүхэндэ зуу-зуу мянган түхэригэй шагнал барюулагдаа. Рустам Мухамедзянов “Арадай шэлэмэл” тулалдаанда илалта туйлажа, 300 мянган түхэригтэ хүртэбэ. “Мүнгэн годли” гэһэн олзын хэрэг эрхилэгшэдэй тэмсээн хойшодоо заншалта болохо юм.
Подписывайтесь
Получайте свежие новости в мессенджерах и соцсетях
