Эсэгын дайнай ба ажалай ветеран, түүхын эрдэмэй кандидат, БГУ-эй доцент Александр Гуружапович Гуружаповые шара нохой жэлэй шэнын нэгэндэ үри хүүгэдынь, аша гушанарынь, түрэл гаралынь золгон мэндэшэлхэеэ ерэбэ. Зуутайб гэжэ сагаалжа байһан ахатан сарюун дорюун зандаа, табатайхан гуша хүбүүнэй амаршалхада, һайхан үреэлээ хайрлажа байба.
Александр Гуружапович Гуружапов Дулдаргын аймагай Алхана нютагта 1919 оной мартын 6-да түрэһэн юм. Тэрэ дунда һургуули дүүргээд, 1936 ондо ахалагша пионервожатаар ажалай намтар эхилһэн байна. Эрхүүгэй багшанарай дээдэ һургуулида һуража байтараа, сэрэгэй албанда татагдаад, 1939 ондо Номгон-Далайн флотто сэрэгэй алба дүүргэжэ ябаа. Эсэгын дайнай үедэ Александр Гуружаповичые Ленинградай сэрэгэй-политическэ училищедэ һурахыень эльгээгээ һэн. Һүниндөө пулемедой хажууда дежурилдэг, үдэртөө номоо үзэдэг байгаа. 1944-45 онуудта эстон ольтирогуудые фашистнуудһаа сүлөөлхэ дайнда хабаадаһан байна.
Александр Гуружапович Гуружапов Улаан Одоной хоёр орденоор, “Дайшалхы габьяагай түлөө”, “Германиие илаһанай түлөө”, “Ленинградые хамгаалһанай түлөө” медальнуудаар шагнагдаһан байна. Александр Гуружапович олохон жэлдэ Буряадай гүрэнэй университедтэ доцентээр, кафедрые даагшаар хүдэлөө. Түүхын эрдэмэй кандидат, 20 гаран эрдэмэй ба методическэ ажалнуудые бүтээһэн байна.
Алхана нютагһаа гарбалтай Эсэгын дайнай ветеран, хоёр дахин Улаан Одон орденто, түхын эрдэмтэн, БГУ-эй доцент Александр Гуружапович Гуружаповые Сагаалганаар амаршалаад, зол жаргалтай, аза талаантай, элүүр энхэ ажаһуухыень хүсэнэбди!
БГУ
1134
Багша, сэрэгшэн зуутай болобо
Алхана нютагһаа гарбалтай Эсэгын дайнай ветеран, хоёр дахин Улаан Одон орденто, түхын эрдэмтэн, БГУ-эй доцент Александр Гуружапович Гуружаповые Сагаалганаар амаршалаад, зол жаргалтай, аза талаантай, элүүр энхэ ажаһуухыень хүсэнэбди!
