Оросой Холбоото Уласай Федеральна Суглаанай Федерациин Зүблэлэй түлөөлэгшэд августын 23-да Буряад Улас ерэһэн байна. Ниигэмэй оршон хангалгын байгуулгын, зайн галай, элүүрые хамгаалгын ба болбосоролой байшангуудые сенаторнууд ябажа хараа.
Буряад Уласай Арадай Хуралай социальна политикын Хорооной түрүүлэгшэ Игорь Марковец элүүрые хамгаалгын байшангуудые ябалсажа хараһан байна. Оросой Холбоото Уласай Федеральна Суглаанай Федерациин Зүблэлэй социальна политикын Хорооной түрүүлэгшын 1-дэхи орлогшо, Буряад Уласһаа сенатор Александр Варфоломеев, Буряадай элүүрые хамгаалгын сайд Евгения Лудупова мүн лэ ябалсаа. Тэдэнтэй суг Оросой Холбоото Уласай элүүрые хамгаалгын сайдай орлогшо Наталья Хорова Улаан-Үдэ хото ерэжэ, элүүрые хамгаалгын байшангуудые ябажа харалсаһан байна.
Уласай клиникын халдабарита үбшэнгүүдые аргалдаг больница нэн түрүүн хүрэжэ, тэндэхи эмшэдтэй уулзаба.
- Мүнөө үедэ больницын байшан ехэ хуушаранхай. Үшөө 1940 ондо баригдаһан байшан мүнөө үеын оршон байдалда таарахаяа болёо. Шэнэ байшан бариха хэрэгтэй, - гэжэ Игорь Марковец хэлэнэ.
Халдабарита үбшэнгүүдые аргалха больница бариха газар талмай бии. Эндэ гансал мүнгэнэй асуудал гарана. Шэнэ байшаниие барилгада 4 млрд түхэриг хэрэгтэй.
-Энэ асуудал шиидхэхын тула, федеральна хэмжээндэ арганууд абтажа байнхай. Мүнөө үе сагай шэнэ больница бүхы эрилтэнүүдтэ тааруугаар баригдаха ёһотой. Федеральна һанһаа мүнгэ һомолхо талаар ажал ябуулагдана, - гэжэ Оросой Холбоотой Уласай элүүрые хамгаалгын сайдай орлогшо Наталья Хорова тэмдэглээ.
Проектнэ-сметнэ саарһа дансануудай талаар техническэ ажал ябуулагдажа эхилбэ. 2025 он болотор шэнэ больница баригдажа, ашаглалгада тушаагдаха ёһотой.
Э.Раднаевай нэрэмжэтэ медицинын колледждо һуралсалай шэнэ байшан бариха талаар ажал ябуулагдана. Эмшэдые һурган бэлдэдэг колледждо аудиторинууд, лабораторинууд хүрэнэгүй. Шэнэ байшан бариха өөрын газартай байна. Жэл бүри бэрхэ мэргэжэлтэдые бэлдэн һурган гаргажа, уласай элүүрые хамгаалгын эмхинүүдтэ эльгээдэг юм. Уулзалгын үедэ энээн тухай колледжын захирал айлшадта хөөрэжэ үгөө.
- Медицинын мэргэжэлтэд мүнөө сагта тон хэрэгтэй. Илангаяа пандемиин эхилхэдэ, хорон хамшаг аргалха эмшэд аргагүй хэрэгтэй гэжэ ойлгоһон байнабди. Буряадай медицинын колледж түгэсэгшэд элүүрые хамгаалгын һалбарида горитой хубитаяа оруулдаг юм, - гэжэ Игорь Марковец һанамжаараа хубаалдаа.
В.Ангаповай нэрэмжэтэ түргэн туһаламжын больницада хирургиин шэнэ байшан хэрэгтэй. Энээн тухай эмшэд сенаторнуудта дуулгаба. БСМП-эйн эмшэд үдэр һүнигүй үбшэнтэниие аргалжа байдаг юм. Үдэр бүри хэдэн зуун арад зон иишээ хандажа, түргэн туһаламжада хүртэдэг тухай тоо баримтанууд гэршэлнэ. Һууринууд хүрэнэгүй, палата соо 7-8 зон хэбтэнэ. Зарим зон коридор соо арга абана. Энэ ехэ бэрхэшээл. Энээн тухай больницын захирал уулзалгын үедэ дуулгаһан байна.
- Федерациин Зүблэлэй түлөөлэгшэд, элүүрые хамгаалгын сайдай орлогшотой суг элүүрые хамгаалгын байшангуудаар ябажа, ажабайдалтайнь танилсаба гээшэ. Түргэн туһаламжын больницада хирургиин шэнэ корпус заал һаа бариха хэрэгтэй. Хүн зон арга абахадаа, һайн байдалда, мүнөө үе сагта тааруу, шанартай эмнэлгэ абаха ёһотой, - гээд Игорь Марковец хандаһан байна.
