Уласай экономикын сайдай орлогшо Виктор Винокурцев энэ асуудалаар элидхэхэдээ бага болон дунда олзын хэрэг эрхилэгшэдтэ нэмэлтэ дэмжэлгэ үзүүлхэ, налог татабариин юрэнхы гуримда хүнгэлэлтэ хэхэ тухай хубилалтанууд оруулагдана гэжэ мэдүүлээ. Тэрэнэй хэлэһээр ажамидаралгын доодо захын хоер хэмжээнһээ бага бэшэ салин заатагүй түлэхэ гэһэн эрилтэ гаргагдана. Тиихэдэ жэл бүри хүдэлмэрилэгшэдэй тоо олошоруулха эрилтэ болюулагдажа, 10 хүнһөө бага бэшэ байха гэһэн шэнэ эрилтэ оруулагдана. Федеральна хуулиин еһоор ЕНВД гэдэг олзо оршоһоо абтадаг ниитэ нэгэ налогой болюулагдахада, юрэнхы гуримаар налог түлэхэ гуримда орохо ставкануудынь шата шатаар ехэ болгогдохо байна. Арадай һунгамалнууд Виктор Винокурцевай зарим дурадхалнуудаар асуудал табяа. Жэшээлхэдэ, короновирусай пандемиһаа бүхы экономико хохидоо. Теэд юундэ 9 һалбари гүрэнэй дэмжэлтэдэ хүртэхэ болоо юм гэһэн асуудал табигдаа. Депутат Олег Федоровой мэдүүлһээр ЕНВД налогһоо Бэшүүрэй аймагай бюджедтэ 8 миллион түхэриг оруулагдаа. Харин юрэнхы гуримаар налог түлэдэг болоходонь 20 миллион түхэриг орохо. Энэ хэды дахин ехэ налог татабари хэгдэхэ болоно гээшэб гэжэ асуугаа. Энэнь бага олзын хэрэг эрхилэлгэ хүгжөөлгэдэ һаад ушаруулха. Тиимэһээ тэдэнэр бага налог түлэдэг ондоо нютагуудта бүридхэлдэ абтаха баатай болохо гэжэ мэдүүлээ. Тиин энэ хуулиин проектээр депутадууд шиидхэбэри абаагүй. Удаадахи зүблөөндэ энэ асуудал дахяад харагдаха болоо.
Общество
304
Арадай Хуралда налогой талаар хуули еһонуудта оруулагдаха хубилалтанууд зүбшэгдэбэ
Экономическа политикын, экологиин талаар хороондо болоһон зүблөөндэ «Буряад уласай налогоор гуримшуулгын зарим асуудалнууд тухай» хуулида оруулагдаха хубилалтанууд хэлсэгдэһэн байна
