Буряад Уласай Хуралай дэргэдэ эрэмдэг бэетэй эрхэтэдэй эрхэ сүлөө хамгаалха асуудалнууд зүбшэн хэлсэгдэбэ. Арадай Хуралай социальна политикын хорооной түрүүлэгшэ Игорь Марковец дүхэриг шэрээ эрхилhэн байна.
Мүнөө үедэ Буряад Уласта эрэмдэг бэетэй 77 мянган зон ажаhууна. Эдэ зоной эрхэ сүлөө хамгаалха асуудалнуудта Арадай Хуралай hунгамалнууд аргагүй ехэ анхарал хандуулдаг юм.
Яамануудай, эмхи зургаануудай түлөөлэгшэд элидхэлнүүдые хэхэдээ, ямар хангалтанууд ябуулагданаб гэжэ хөөрэжэ үгэбэ. Сэрэгэй тусхай операцида хабаадаад, эрэмдэг бэетэй болоhон зондо онсо анхарал хандуулагдадаг тухай хэлэгдээ. «Общество без барьеров» жасын түрүүлэгшэ Батор Панаев хотын инфраструктура тухай, мүн транспортын талаар бэрхэшээлнүүд тухай асуудалнуудта анхарал хандуулаа. Дүхэриг шэрээн дүнгүүдээр Буряад Уласай Арадай Хуралай hунгамалнууд hанамжануудаа элирхэйлжэ, эндэ хэлэгдэhэн бэрхэшээлтэ асуудалнуудые шиидхэхэ тухай найдуулаа.
