Буряад Уласай Арадай Хуралай Түрүүлэгшэ Владимир Павлов Буряадай АССР-эй Верховно Зүблэлэй Түрүүлэгшэ, ВСГТИ-гэй түрүүшын ректор, уласай мэдээжэ ажал ябуулагша Дамнин Фроловай түрэhөөр, 100 жэлэй ойн баярта зорюулагдаhан хэмжээ ябуулгада хабаадаба. Бэрхэ хүтэлбэрилэгшэ ябаhан Дамнин Шагдурович тухай тайзан дээрэhээ дулаан олон үгэнүүд хэлэгдээ.
«Дамнин Фролов хадаа буряадай урдаа хараха хүнүүдэй нэгэн гээд хэлэхэдэ, алдуу болохогүй. Эрдэм болбосоролой талаар ехэ ажал ябуулжа, уласай ниигэмэй-экономикын хүгжэлтэдэ аргагүй хубитаяа оруулаа. Агууехэ дайнда хабаадаhан намтартай. 18 наhа хүрөөгүй байгаад, Эхэ Ороноо хамгаалхаяа ошоо. Бэрхэ хүтэлбэрилэгшэ байhанайхи, Буряадай АССР-эй Верховно Зүблэлэй Түрүүлэгшээр хүдэлhэн намтартай. Энэ хүн тухай дурасхаал хэтын хэтэдэ манай зүрхэ сэдьхэл соо үлэхэ»,-гээд Владимир Павлов хэлэбэ.
Баярай суглаанай үедэ дээдэ hургуулиин багшанарта Арадай Хуралай Хүндэлэлэй грамотанууд, баярай бэшэгүүд барюулагдаhан байна.
