Буряад Уласай Арадай Хуралай ниигэмэй политикын талаар хорооной түрүүлэгшын орлогшо Вячеслав Дондоков олондо мэдээсэл тараадаг эмхиин түлөөлэгшэдтэй hаяхана уулзаба. Сэрэгэй тусхай операцида командировкодо байхадаа, нютагайнгаа хүбүүдэй ами наhа абарха талаар ехэ ажал ябуулhан байна.
Анестезиолог эмшэнэй тэмдэглэhээр, сэрэгшэднай дайлалдажа hураа, ехэл зоригтойнууд болонхой.
«Шарха абаhан хүбүүдэй дунда Буряадай сэрэгшэд заримандаа тудалдадаг байгаа. Ямар нютагай гэхэhээ эхилээд, суг танилнуудтай болошохош», - гээд Вячеслав Дондоков хэлэнэ.
Сэрэгэй тусхай операцида олон эмшэд дуталдадаг тухай мүн лэ мэдээсээ.
«Шарха абаhан сэрэгшые зүбөөр аргалха хэрэгтэй. 2022 ондо мобилизацида абтаhан хүбүүд олон байгаа. Мүнөө харахада, залуушуул олоор СВО руу ошоно. Баатар зүрхэтэй сэрэгшэднай 18-19 наhатайhаа эхилнэ», -гэжэ тэрэ хөөрэбэ.
Агууехэ Илалтын 80 жэлэй ойн баяртай дашарамдуулан, Арадай Хуралай hунгамал дайнда хабаадаhан үбгэ эсэгэнэр тухайгаа хөөрэжэ үгөө. Чимит-Доржо Цыбенович Хайбзанов ба Цыбенов Хайбзан Будаевич хоёр Агууехэ дайнда хабаадажа, Эсэгэ Ороноо хархис муухай дайсадhаа хамгаалhан юм.
Уулзалгын түгэсхэлдэ сэрэгэй тусхай операцида туhа хүргэжэ байhан зондо ехэ баяраа мэдүүлээ.
«Буряад Уласай Арадай Хуралай hунгамалнуудта, манай Түрүүлэгшэ Владимир Павловта баярые хүргэнэб. Илалта туйлаха хэрэгтэ хубитаяа оруулжа байhан арад зондо үнэн зүрхэнhөө баяраа мэдүүлнэб», -гээд Вячеслав Дондоков хэлээ.
