2021 оной январиин 1-һээ хүдөөгэй багшанарай салин дээшэлүүлхэ шиидхэбэри тушаа һанамжаяа Игорь Марковец элирхэйлбэ

Короновирусай һүжэрһэн үедэ тэрээнтэй тэмсэлдэ горитой мүнгэнэй гаргашалагдажа байхада энэ алхам шухала политическа шиидхэбэри болоно гэжэ тэрэ сэгнэнэ. Болбосоролой хүндүүлхэй асуудалнуудые шиидхэхын тула уласай засагай газар үсэд нэтэрүүгээр хүдэлнэ. Онсолходо, һургуулинууд баригдана, заһабарилагдана. Удаадахи алхамдань багшанарые дэмжэн салингыень дээшэлүүлхэ шиидхэбэри абаба гэжэ тэрэ тэмдэглэнэ. Арадай Хуралай һунгамалнуудай үүсхэлээр хоер жэлэй саана засагай газарай түлөөлэгшэдтэй хамта хүдэлмэриин бүлэг байгуулагдажа, багшанарай салин дээшэлүүлхэ арга боломжонууд зүбшэгдөө. 2019 ондо энэ талаар тодорхой шиидхэбэринүүд абтаа һэн. Уласай бюджедһээ 413 миллион гаран түхэриг энэ хэрэгтэ шэглүүлэгдээ. Мүнөө хүдөөгэй һургуулинуудай багшанарай салин бусад һургуулинуудай багшанарай салинтай адли болгохын тула 402 миллион түхэриг һомологдохо болобо. Багшанарай салин түлэлгэдэ түрүүшынхиеэ 6 миллиард гаран түхэриг бюджет соо хараалагдахань. Ноябрь соо болохо Арадай Хуралай сессидэ эрэмдэг бэетэй үхибүүдые эдеэ хоолоор хангаха тухай хуулиин проект зүбшэгдэхэ гэжэ тэрэ мэдээсээ.

Автор: