Мүнөө Солонгос Улас Буряадтай худалдаа наймаа ябуулдаг шухала гүрэн болоно. Уласаймнай гадаадын худалдаа наймаанай эрьесэдэ тэрэ табадахи һуури эзэлдэг юм.
“Бидэ элдэбын шэглэлнүүдээр харилсаа холбоотойгоор хүдэлхэ арга шадалтайбди. Энэмнай аяншалга, нарин оньһото үйлэдбэри, байгаалиин нөөсэнүүд, мүн бусадшье шэглэлнүүд болоно. Суг хамтымнай ажал хүгжэжэл байха гэжэ бата найданаб”, - гэжэ уулзалгын эхиндэ Алексей Цыденов онсолон тэмдэглээ.
Эрхүүдэ Солонгосой Генеральна консул Ом Ки-ён эдэ үгэнүүдые дүүрэн дэмжэжэ байһанаа мэдүүлээ.
“Худалдаа наймаанай ба аяншалгын һалбарида харилсаа холбоонуудаа һайжаруулха талаар һайн дүнгүүд туйлагдажа байна. 2014 оной янһарь һараһаа Солонгос ба Ородой Холбоото Улас хоёрой хоорондо зүбшөөлэй тэмдэггүйгөөр ябаха тухай хэлсээн баталагдаа һэн. Тиигэжэ гүрэнүүдэймнай хоорондо ябаһан зоной тоо олошороо. 2018 ондо футболооор дэлхэйн чемпионадай үнгэргэгдэхэдэ, Солонгосһоо олон хүн ерэхэ. Мүн энэл жэлэй февраль һарада манай гүрэндэ үбэлэй Олимпиин нааданууд болохо . Тиин эдэ хоёр ехэ хэмжээ ябуулгануудай ашаар гүрэнүүдэймнай хоорондохи харилсаан һайжарха”, - гэжэ ОМ Ки-ён тэмдэглээ.
2017 оной 9 һарын туршада Буряад орон Солонгос Уластай 102,9 сая долларай хэмжээндэ гадаадын худалдаа наймаа эрхилһэн байна. Нёдондонойхитой сасуулхада, 91,6 хубиин ургалта болоно. Тиихэлээрээ манай гүрэн 102,1 сая долларой эд бараа Солонгос руу худалдаа, 0,8 сая долларай бараа тэндэһээ асараа гээшэ.
Эдэй засагай талаар харилсаата ажал ябуулхаһаа гадна соёлой, уралигай, болбосоролой һалбаринуудта харилсаа холбоонууднай эдэбхитэйгээр хүгжэжэ байнхай. 2017 оной июнь соо Буряад Уласай Үндэһэтэнэй номой сангай, Үбэр Байгалай хизаарай арадуудай этнографическа музейн, Буряад Уласай Үндэһэтэнэй музейн болон Солонгос Уласай Азиин соёлой түбэй хоорондо харилсан хүдэлхэ тухай һэдэлгын бэшэг баталагдаа. Можо нютагуудай зохёохы бүлгэмүүд Буряадташье, Солонгостошье үнгэргэгдэдэг арадай уралигай фестивальнуудта, мүрысөөнүүдтэ, зүжэгүүдтэ, үзэсхэлэнгүүдтэ, конференцинүүдтэ хабаададаг. Харин мүнөө сагта болбосоролдо ба хүүгэдэй амаралтада хабаатай харилсаанууд хүгжэжэ байна.
