Хуралай Зүблэлэй сентябриин зүблөөндэ бэлдэлгын хэмжээндэ тэрэ эмхидхэгдээ юм.
Үйлэдбэриин захирал Анатолий Суслов ерэгшэдые заводоороо дахуулан ябуулжа, шиидхэгдээгүй асуудалнууд тухайгаа хөөрэжэ үгөө. Мүнөө дээрээ Сибирь болон Алас Дурна зүгтэ хүүргын түмэр армагуудые үйлэдбэрилдэг ори ганса завод хүндэ байдалда оронхой. Банкнуудта нилээд ехэ үритэй болонхой, ажалшадта салин түлбэриин талаар үри 20 сая түхэригтэ хүрэнхэй.
Эндэ 700 хүн хүдэлдэг юм. Анатолий Сусловай хэлэһээр, мүнөө байһан эдэ зониие ажалһаа болюулжа огто болохогүй: гол хүсэн лэ үлэнхэй. Үгы гэбэл, һайн сагуудай ерэхэдэ, цехүүдтэ ажаллаха зон олдонгүй, завод дахинаа нээгдэхэшьегүй.
- Зүблэлтэ засагай үедэ Унаагай барилгын яаман гэжэ байгаа, - гэжэ “Стальмостын” хүтэлбэрилэгшэ хэлээ. – Харин мүнөө тиимэ юумэн үгы. Бүхы һалбаримнай доройтонги байдалда. Тиимэһээ федеральна хэмжээндэ харюусалгатай зургаан хэрэгтэй болоод байна. Барилгын яаманай дэргэдэ агентствэшье эмхидхэбэл хамаагүй.
Энээндэнь Анатолий Кушнарев Арадай Хуралай һунгамалнууд тус үүсхэл зүбшэн хэлсэхээр бэлэн, хэрэгтэй юм һаань, федеральна хэмжээндэшье иимэ дурадхал оруулха гэжэ харюусаа. Зүгөөр Буряад Уласые хүүргын армагуудые бүтээдэг заводуудтай бусад можо нютагуудай дэмжээ һаа, һайн байха һэн гэжэ тэрэ тэмдэглээ.
Арадай Хуралай Эдэй засагай бодолгын хорооной түрүүлэгшэ заводто гүрэнэй дэмжэлгын ямар хэмжээнүүдые үзүүлжэ боломоор бэ гэжэ асуугаа. Теэд дэмжэлгын хэмжээнүүд тиимэшье олон бэшэ байшоо. Уласай ажаүйлэдбэриин ба худалдаа наймаанай сайдай нэгэдэхи орлогшо Алексей Унгаевай хэлэһээр, федеральна бодолгын шэглэл хадаа ажахые абаралгада бэшэ, хүгжэлтэдэнь мүнгэ һомололго болоно. Жэшээнь, гүрэнэй найдуулгада хүртэхын тула ехэ һомололготой тусхай түсэлтэй байха ёһотой, гадна үйлэдбэриеэ һайжаруулха хэрэгтэ горитой мүнгэ гаргашалхаар бэлэн байха хэрэгтэй.
- Энэ асуудал сентябриин 21-дэ үнгэргэгдэхэ Арадай Хуралай Зүблэлэй зүблөөн дээрэ табихабди, - гэжэ Анатолий Кушнарев тобшолоо. – Засагай газарта зууршалганууд үгтэжэ, һунгамалнуудай хиналта доро абтаха.
