Гэртээ байлгын гуримай үедэ, майн 6-да зарлагдаһан энэ хуралдаа хойшолуулхамнай гү гээд Соведэй зүблөөндэ асуудал табигдаа. Харин диилэнхи депутадууд, Хуралай түрүүлэгшэшье энэ дурадхалые дэмжээгүй. Сугларха хэлсэхэ асуудалнуудай элбэг хада, хамаг хамгаалалтын хэмжээннүдые абажа үнгэргэе гээд шиидхэгдээ. Хуряангы гуримаар гэхэ гү, али үсөөнөөр сесси үнгэрхэ. Засагай газарһаа гансал Буряадай толгойлогшо Алексей Цыденов болон засагай газарай түрүүлэгшын нэгэдэхи орлогшо Игорь Зураев уригданхай. Депутадууд бэе бэеһээ зайтай һуухаар эмхидхэгдэхэ. Сэтгүүлшэд табигдахагүй. Арадай һунгамалнууд бүхыдөө 21 асуудал хараха, тэрэ тоодо Хуралай түрүүлэгшын орлогшо Баир Жамбаловай, КПРФ фракциһаа салинта тушаалнуудта хүдэлдэг Виктор Малышенкын болон Егор Олзоевой хуби заян шиидхэгдэхэ. Мүн коронавирусай үедэ эмхи зургаануудаа, бага болон дунда түхэлэй олзын хэрэг эрхилэлгэеэ дэмжэхэ тухай асуудалнууд харагдаха гээд Арадай Хуралай хэблэлэй албан дуулгаба.Буряад уласай байгша оной бюджедэй олзын хуби 6 миллиард шахуу түхэригөөр бага болобо гээд мэдээсээ һэмди. Энэнь коронавирусай хойшолон гэжэ ойлгосотой. Бэлэн бэшэ энэ дабаае гүрэн түрэтэео хамта дабахабди гээд Арадай Хуралай түрүүлэгшэ Владимир Павлов найдуулба.
Общество
353
