Амаралгын газарнуудай асуудалаар Буряад Уласай Арадай Хурал жэл хахад тухай хугасаада ажал ябуулна. Һунгамалнууд табан аймагуудаар ябажа, аршаанта газарнуудые шалгажа үзэһэн байха юм. Удаань Арадай Хуралда дүхэриг шэрээ үнгэргэгдэбэ.
- Хараһан бүхы газарнууднай намда һайшаагдаагүй. Хааанашье, алишье газарта эмхидхэгдээгүй, зэрлиг аяншалга, амаралга. Хүн зониие аргалха, эмнэлгын карта түсэбгүй. Хайшаа шэглэнэбиибди? Хайшан гэжэ элүүржүүлхэмнайб арад зониие, мүн хайшан гээд олзо орошо оруулха гээшэб гэжэ ойлгохо ёһотойбди, -гэжэ Анатолий Кушнарев онсолбо.
Буряад Уласай мүнгэн зөөриин яаманай аяншалга хүгжөөлгын таһагай дарга Максим Шариповай хэлэһээр, Буряад Уласай дэбисхэр дээрэхи 300-гаад аршаанта газарнуудай үсөөхэниинь лэ бальнеологиин аяншалга хүгжөөлгэдэ таарамаар, зүгөөр оройдоол нэгэниинь тусхай экспертнэ үнэмшэлгэтэй. 13 аршаанта газарнуудай үнэмшэлгын болзор дүүрэжэ байна. Зарим курортнуудые эзэдынь буляалдажа, сүүдэй заргаар татасалдана.
Экономикын яаман аяншалга хүгжөөлгын асуудалаар 2015 онһоо ажал ябуулжа эхилээ. Харин элүүрые хамгаалгын яаман үнинэй энэ асуудалаар ажаллабашье, гансал курортнуудта эмнэлгын үүргэ дүүргэдэг гүрэнэй хэмжээнэй зэргын эрхэ нүхэсэл олгуулха талаар лэ ажал ябуулдаг.
- Харин оршон тойронхи байгаали хамгаалгын талаар байгаалиин нөөсэ хамгаалгын яаман, бусад асуудалнуудаар нютагай газарай эзэд, захиргаан шиидхэхэ болоно. Зүгөөр аяншалга амаралгын газар хүгжөөлгын нэгэ харюусалгата эмхи үгы болоно, Буряад Уласай энэ асуудалаар хуулишье бэелүүлэгдэнэгүй, - гэжэ Анатолий Кушнарев тодорхойлбо.
Дүхэриг шэрээн түгэсхэлдэ амаралгын газарнуудые хүгжөөлгын талаар бэрхэшээлтэй байдалаар нэгэдэһэн харгы зам бэдэрхэ тухай хэлсэгдэбэ. Энэ талаар, нэн түрүүн хуулида хубилалта хэхэ, экономикын яаманда тус һалбари хүгжөөлгын тусхай бүлэг байгуулха, мүнгэн зөөри шэнгүүлхэ талмай байгуулжа, саг зуура бэелүүлгын түсэл ашаглаха тухай зүбшэлсэбэ. Мүн Буряад Улас дотор курортнүүдые хүгжөөлгын ажал ябуулдаг харюусалгатай эмхи байгуулха талаар асуудал шиидхэгдэхэ юм.
