Буряад Уласай Арадай Хуралай социальна политикын хорооной түрүүлэгшэ Игорь Марковец залуушуулай бүхэроссиин олониитын «Россиин оюутадай отряд» гэһэн Буряадай таһагай эмхиин гэшүүдтэ баярай бэшэгүүдые барюулба.
- Эгээл бэрхэ буряадайнгаа хүбүүд, басагадта баяраа мэдүүлнэб. Шухала хэрэгтэ хабаадахадаа, үнэн сэдьхэлһээ өөрынгөө хубитые оруулжа шаданат. Восточный һууринда оршодог “Авиастроитель” гэһэн ветерануудай зүблэлдэ ехэ туһа суг хамта хүргөөбди. Жэл бүри элдэб хэмжээ ябуулгануудые эмхидхэжэ, ехэ ажал ябуулаат. Гэртээ гансаараа үлэнхэй наһажаал зондо ошожо, гэрыень сэбэрлэжэ, угаажа, заһабарилжа буянтай ажал эмхидхээбди. Агууехэ дайнай 5 ветеранай гэрые нёдондо жэл заһабарилга хээд, тэдэниие баярлуулжа шадаабди. Үнгэрһэн үбэл ветерануудай зүблэлэй оршодог байшаниие угаажа, аршажа, аргагүй ехэ ажал ябуулаат гэжэ тэмдэглэнэб.
Оюутадай отрядай гэшүүд агууехэ дайнай болон ара талын ветерануудта ошожо, саг үргэлжэ туһа хүргэжэ байдаг юм.
- Бидэ элдэб хэмжээ ябуулгануудта хабаададаг, эмхидхэгдэг байнабди. Аймагуудаар ябажа, гансаараа байдаг зондо, үндэр наһатайшуулда туһа хүргэдэгбди. Буряадай Арадай Хуралай һунгамал Игорь Марковец иимэ зондо ямар ехэ туһа хүргэнэб даа, энэнь сэгнэшэгүй, - гээд оюутадай отрядай эмхиин гэшүүн Ирина Занданова хэлэнэ.
Арадай Хуралай болоһон уулзалга дээрэ залуушуул ябуулдаг ажал тухайгаа хөөрэхынгээ хажуугаар, ябуулгынгаа үрэ дүн гаргаһан байна.
- Восточный һууринда ажаһуудаг ветерануудые хүндэлжэ, гэртэнь сэбэрлэлгын ехэ ажал хэхэдээ, түлөөһэгүйгөөр, булта үнэн сэдьхэлһээ хабаадаабди. Үндэр наһатай зон бидэнтэй уулзахадаа, наһанайнгаа намтар тухай хөөрэжэ үгөө. Бидэ тэдэниие шагнажа, баярыень хубаалдаһандаа, ехэ омогорхонобди, - гэжэ Галина Баргуева хэлээ.
Оюутадай отрядай хабаадалгатайгаар улас дотор элдэб хэмжээ ябуулганууд үнгэрдэг юм. Зунай сагта тэдэнэр Сахалин ошожо, загаһа сэбэрлэлгын ажалда хабаададаг заншалтай, мүн тиихэдэ барилгын ажалнуудта олоор хабаададаг байна.
